L‑Arċisqof Charles Scicluna żar il‑Boys’ Learning Support Centre fil‑Ħamrun, fejn qatta’ ħin mal‑istudenti li jattendu dan iċ‑ċentru kif ukoll mal‑għalliema tagħhom.
Matul iż‑żjara, l‑istudenti wrew lill‑Arċisqof kif iqattgħu l‑ġurnata, fosthom bit‑tagħlim prattiku ta’ diversi snajja’ u xogħlijiet tradizzjonali Maltin. Dawn jinkludu s‑sengħa fl‑injam, il‑ħadid, il‑ġebla u t‑tqegħid tal‑madum, kif ukoll tisjir, tkabbir tal‑annimali u l‑ħxejjex, u xogħol fl‑arti taċ‑ċeramika, it‑tafal, il‑fuħħar u forom oħra.
Bi preparazzjoni għar‑Randan, bil‑gwida tal‑edukaturi tagħhom, l‑istudenti ħejjew mejda tal‑appostli magħmula kollha kemm hi minn ikel u affarijiet li għamlu huma stess. Din hi miftuħa għall‑pubbliku u għal studenti minn skejjel oħra. Matul din iż‑żjara, l‑Arċisqof bierek ukoll statwa tal‑Madonna li t‑tfal stess reġgħu tawha ħajja u sinifikat b’xogħol ta’ restawr fil‑ħin tal‑iskola.
Il‑Kap tad‑Dipartiment, is‑Sur Warren Muscat, spjega li dan iċ‑ċentru jmur lil hinn minn post ta’ tagħlim; hu post li joffri mħabba, tama u t‑tieni ċans. Hawnhekk, studenti bejn il‑11 u s‑16‑il sena li għandhom diffikultajiet soċjali, emozzjonali jew ta’mġiba, jirċievu attenzjoni individwali u għajnuna oħra li tgħinhom ikollhom irwol fis‑soċjetà.
Din iż‑żjara saret proprju fis‑sena li l‑Knisja qed tiċċelebra l‑Ġublew tat‑Tama, għaliex l‑edukaturi f’dan iċ‑ċentru huma proprju ‘pellegrini tat‑tama’. Grazzi għad‑dedikazzjoni u l‑ħidma tagħhom, l‑edukaturi jieħdu ħsieb u jgħinu lis‑subien jagħrfu l‑potenzjal kbir tagħhom.
L‑Arċisqof Charles Scicluna rringrazzja lill‑istudenti tan‑nofstanhar li qatta’ magħhom u ħeġġiġhom sabiex fl‑aħħar tal‑ġurnata jiftakru fl‑affarijiet kollha li tgħallmu dakinhar. Mons. Arċisqof irringrazzja lill‑edukaturi kollha li jagħmlu ħilithom sabiex jagħtu futur sod lil dawn it‑tfal.
Fi kliem il‑Prinċipal tal‑Kulleġġ St Thomas More, is‑Sur George Psaila, l‑istudenti ta’ kuljum jgħallmu lill‑edukaturi u l‑istaff xi tfisser ikollok tama f’valuri bħall‑inklużjoni, il‑ġustizzja soċjali u r‑rispett lejn kull tip ta’ differenza.
