It-Tifsira Spiritwali tal-Pellegrinaġġ

Il-pellegrinaġġ Nisrani huwa vjaġġ estern simboliku li jintegra b’mod sħiħ mal-vjaġġ intern tagħna fil-mixja ta’ dixxipulat tagħna lejn Alla. Huwa vjaġġ li fih jinvolvi wkoll espressjoni ta’ penitenza u normalment iwassal sa destinazzjoni ta’ tifsir sagru. Il-pellegrinaġġ huwa vjaġġ bi skop, li jistiednek tagħmel sens minn ħwejjeġ ordinarji tal-ħajja, fosthom postijiet li niffrekkwentaw, relazzjonijiet, u l-modi t’għajxien biex insostnu ħajjitna. Fir-riflessjoni ta’ dan kollu, nagħrfu l-opportunità biex nirrelataw mill-ġdid m’Alla f’integrità sħiħa mal-imġjibiet tagħna.

Għaldaqstant, pellegrinaġġ jimplika għażla. Anke jekk il-pellegrini mhumiex neċessarjament barranin, iridu jagħrfu li huma barranin fuq din l-art biex iħaddnu fi ħdanhom ir-riskji tal-vjaġġ. Dan it-tħaddin ta’ kull qasam f’ħajjitna, il-ferħ u l-qtiegħ il-qalb, jgħaqqad il-vjaġġ materjali ma’ dak li hu interjuri bit-tama li ultimtament nibbenefikaw minn benefiċċju spiritwali wieħed: il-laqgħa personali tagħna m’Alla.

Pellegrinaġġ fid-dinja tal-lum

F’soċjetà kontemporanja, il-pellegrinaġġ imiss ma’ diversi aspetti tal-ħajja. Ġeneralment, il-bżonn għallpellegrinaġġ jitwieled minn xewqa li wieħed jitwaħħad miegħu nnifsu u li joħroġ imqar għall-ftit mir-rutini ta’ kuljum. Dawn ix-xewqat jagħtuna l-opportunità biex nerġgħu niskopru mhux biss l-emozzjonijiet u l-valuri tagħna, imma wkoll il-fidi. Hija tfittxija li minnha niskopru s-sejħa għal sħubija m’Alla permezz ta’ laqgħat ma’ nies, saħansitra ma’ stranġieri, li jaqsmu magħna esperjenzi bħal dawn.

Hi esperjenza intensiva li ħafna drabi nibqgħu nġorru tul ħajjitna u li spiss titlob minna bidla fil-mod ta’ kif ngħixu.

1. Agħżel destinazzjoni jew rotta li tixtieq taqbad fl-2025. Ikun għaqli li fil-vjaġġ ikun hemm vista għal xi Bieb Imqaddes. Din il-vista tista’ tkun waqfa temporanja jew id-destinazzjoni aħħarija tal-vjaġġ.

2. Agħżel ma’ min se tivjaġġa. Il-possibiltajiet huma tlieta: li tivjaġġa waħdek, ma’ nies familjari għalik (qraba jew ħbieb), kif ukoll ma’ nies li huma kompletament stranġieri għalik. Jekk m’intix esperjenzat, ikun għaqli li l-ewwel pellegrinaġġ tiegħek ma tagħmlux b’mod solitarju, speċjalment jekk m’intiex familjari mal-akkwati.

3. Iddeċiedi kemm tixtieq tqatta’ ħin fil-vjaġġ. Ħu ħsieb mhux biss kemm għandek ġranet disponibbli, imma wkoll is-saħħa fiżika tiegħek. Preferibilment tħejji lilek innifsek fi vjaġġi f’akkwati li int familjari magħhom qabel il-pellegrinaġġ innifsu biex tagħraf il-pass u l-limitazzjonijiet tiegħek.

4. Dejjem ftakar biex iġġorr miegħek dak li hu essenzali: basket komdu, ilbies addattat għat-temperaturi tal-pajjiż, ilma, inċirata, kappell, nuċċali tax-xemx u krema ta’ prevenzjoni għall-effetti tax-xemx.